Mawazo Misukosuko

Wawaza na masumbuko, wawaza washika tama,
Wawaza kupata jiko, wawaza kwenye mtima,
Wawaza pata mshiko, wawaza ukilalama,
Mawazo umetuwama, mawazo misukosuko.

Wawaza na chokochoko, wawaza wanakusema,
Wawaza na matamko, wawaza zile shutuma,
Wawaza wapa msako, wawaza bila huruma,
Mawazo umetuwama, mawazo misukosuko.

Wawaza bahati yako, wawaza utaidema, Wawaza kwenye anguko, wawaza wamekutema,
Wawaza na filisiko, wawaza ati dhuluma,
Mawazo umetuwama, mawazo misukosuko.

Wawaza fanya vituko, wawaza vikawe vyema,
Wawaza kisa limbuko, wawaza mlani mama,
Wawaza weka zindiko, wawaza chinja mnyama,
Mawazo umetuwama, mawazo misukosuko.

Wawaza pesa kuliko, wawaza kuuza nyama,
Wawaza mteremko, wawaza mboga kuchuma,
Wawaza wapa mwaliko, wawaza pia na wima,
Mawazo umetuwama, mawazo misukosuko.

© Alvin Aron, 2018

Tafadhali usikose kuongeza Maoni yako kuhusu shairi hili.

Baruapepe yako haitaoneshwa hadharani. Maeneo yenye alama * ni lazima yajazwe!